La bona querencia pa tou aquello que nos define como lo que somos ye la esencia del asturianismu. Trabayar col envís de dir allugando a Asturies nun espaciu de progresu y bientar siempres foi’l meyor de los enfotos pa tola xente asturiano que, nel trescursu de les dómines, tuvo a bien facer de la asturianidá una exa básica pal desarrollu.
Esti añu, tamos cellebrando’l bicentenariu de la muerte de don Gaspar Melchor de Xovellanos, figura esencial nesi periodu de gran avance intelectual y lliterariu que fuera la Ilustración Asturiana. El prócer xixonés dexó escrito lo que sigue refiriéndose al idioma autóctonu d’esta tierra:
“Ye la llingua viva del nuestru pueblu, mamámosla toos, como quien diz, col primer lleche; va pasando tradicionalmente de padres a fíos y continúase de xeneración en xeneración […] Con un cartón y un llápiz a mano, en casa, na cai, nel paséu, nel campu, podemos arriquecer tolos díes esi tesoru preciosu”.
Con esa ferramienta que ye la llingua asturiana, cuantísimayá vien perfaciéndose la lliteratura de nuestro; a lo menos, dende qu’en 1.639 s’escribiera’l Pleitu ente Uviéu y Mérida pola posesión de les cenices de santa Olaya. Per otra parte, va pa cuatro décades qu’asistimos a un nuevu procesu de recuperación y espardimientu de les lletres de nós. Un tiempu abondosu en llogros, en nomes y trayectories, n’esperiencies ya iniciatives.
Asina, cuando en 2006 tien empiezu L’Arribada, yera muncho lo que podíemos amosar. D’entós p’acó afitamos un proyectu nacíu pa facer enforma visible la lliteratura, y la cultura, construyíes cola llingua del país; un proyectu abiertu, democráticu, ensin canon, nin prexuicios, nin sectarismu; arreyáu a les estayes sociales implicaes nel conocimientu, onde ye posible la participación de lliteratos, investigadores, artistes, editores, estudiosos y ciudadanía.
L’Arribada de 2011 axunta un bon númberu de collaboradores de tou tipu, naguando por espeyar la collecha última de la lliteratura asturiana y les sos influencies. Nesta edición de L’Arribada acoyemos a un cientu y mediu de participantes, una trentena de presentaciones lliteraries, homenaxes, conferencies y comunicaciones, proyecciones cinematográfiques, llectures poétiques, tertulies, esposiciones, ente más otro.
Llevamos con ésti seis años arribando a un bon puertu como ye’l de Xixón. Nel tiempu viniente, dende equí, tendremos d’arribar tamién a otros puertos, de la que seyamos pa recuperar carreros na mar cantábrica que nos empobinen a riberes y cultures hermanes, o de la que lleguemos a otres llatitúes atopando llonxanos piélagos. Pero siempres dende’l puxu vital de lo asturiano porque, parafraseando al conceyal de cultura d’esti conceyu, “la única manera de conocer el mundu de verdá parte de conocer el to prau”.
arribada.wordpress.com 