Julio Sánchez-Andrade Fernández presentará na Arribada 2009 el so llibru "La percusión en la música tradicional asturiana"

El prósimu 28 de setiembre, en dientro de l’Arribada 2009, va presentase’l llibru de Julio Sánchez-Andrade Fernández La percusión en la música tradicional asturiana. Esta obra propón una visión xeneral del campu de la percusión na nuestra música tradicional, aportando descripciones de los instrumentos, el so allugamientu xeográficu, la so función social, les técniques de construcción y les maneres d’interpretar. La opinión y el criteriu de los propios músicos -más de cien- son parte fundamental d’esti estudiu, qu’inclúi cachos de la mayoría de les entrevistes feches pelo llargo de los seis años que duró la investigación. El llibru compleméntase con un DVD coles partes musicales más representatives recoyíes n’audiu y vídeu, asina como tamién coles partitures coles trescripciones rítmiques más relevantes.

La percusión en la música tradicional asturiana llogró’l segundu Premiu Nacional nel concursu d’investigación cultural «Marqués de Lozoya», correspondiente al añu 2004. Tamién foi Premiu Estraordinariu de Doctoráu del Departamentu d’Historia del Arte y Musicoloxía de la Universidá d’Uviéu nel añu 2006.

Julio Sánchez-Andrade Fernández ye profesor superior de percusión pol Real Conservatoriu de Música de Madrí y doctor pola Universidá d’Uviéu. Publicó en 2000 Campanas y campaneros del Arciprestazgo de Gijón y en 2006 2006 Siete estudios para vibráfono: Introducción, cinco bailables y un adiós. Collaboró cola Orquesta Muñiz Toca, Orquesta Sinfónica de Asturias, Sinfónica del Principado de Asturias, Orquesta Sinfónica Ciudad de Oviedo, Orquesta Sinfónica de Madrid o los Virtuosos de Moscú, ente más otros. Tamién partició en formaciones musicales d’estremaos estilos como son rock, pop, folclore asturianu y cantautores del ámbitu estatal: Avelino López, Carlos Rubiera, Chus Pedro, Crack, Daniel Vega, Julio Ramos, La Turulla, Manolo Quirós, Manuel Fernández, Mari Trini. Nova, Nuberu, Paso de Cebra, Rosa María Lobo, Son les Poles, etc.